Müdafiə Nazirliyindəki 143 milyonluq mənimsəmə faktı ilə bağlı cinayət işindən ayrılmış epizod üzrə həbs edilən “N” saylı hərbi hissənin sabiq maliyyə-xidmət rəisi kapitan Vahid Novruzlunun məhkəmə araşdırması başa çatıb.

“Qafazinfo"in məlumatına görə, Bakı Hərbi Məhkəməsində keçirilən sonuncu iclasda hökm oxunub.

Fikrət Əliyevin sədrlik etdiyi məhkəmə tərkibi Novruzlunu xüsusilə külli miqdarda mənimsəmə cinayətində təqsirli bilib.

Hökmə əsasən o, 11 il müddətinə azadlıqdan məhrum edilib.

Qeyd edək ki, V.Novruzlu Dövlət Təhlükəsizliyi Xidmətinin (DTX) apardığı istintaq çərçivəsində cinayət məsuliyyətinə cəlb olunub. İlkin mərhələdə istintaq orqanı kapitana dövlətə vurulan ziyanı ödəmək şərti ilə azadlıqda qalmaq imkanı versə də, ziyan ödənilmədiyi üçün sonradan barəsində həbs qətimkan tədbiri seçilib.

Sail Ağasəlim